هام جدا < يا ريت كلنا نستفيد >

قرأت رسالة رائعة للزميلة العزيزة منار عقل العضوة بجمعية نهر الحياة الخيرية
بصفتي عضو بنفس الجمعية ووجدتها رائعة
ولذلك قررت ان اعرضها عليكم حتي لا نقع في اخطاء بسيطة قد
لا ننتبة اليها ولكنها تنمي احساس رهيب لدي اليتيم
والان اترككم مع الرسالة


"""""""""""""""""""""""""""""
السلام عليكم و رحمة الله و بركاته

حكلمكم عن مشاعر بيحس بيها بعض المتطوعين في المجال الخيري الإنساني
و عن افكار جديده يا ريت تعجبكم و تستفيدوا منها و تطلع صحيحه من الناحيه الدينيه




الحكايه بدأت لمّا حضرتك قررت توصل فلوس لحد مريض او تدفعها في دار ايتام او توزع ملابس او اكل .... الخ من اشكال الخير حتى لو مكانتش تبرعاتك لوحدك و حتى لو كنت مشارك فقط بالجهد و مش حاطط مليم من جيبك فيها

برده الناس الجميله دي اللى ربنا بيختارك عشان تقدم لهم الخير اللى ربنا امرك توصله ليهم بيفضلوا يدعو لك و يظهروا فرحه عظيمه بمجيئك و يشكروك من كل قلبهم

و لو حلفت لهم 100 مرة انك مجرد واسطه او ان الحاجه دي من عند ربنا

برده بيصروا يدعو لك و ساعات تسمع عبارة مشهورة ( و هي انك الخير و البركه و انه كتر خيرك انك تعبت نفسك و فكرت فيهم و ان لولاك مكانتش الحاجه راحت لهم ... الخ ) و

و لمّا حضرتك تطوعت انك توصل الإحتياجات دي لأصحابها بإيدك سواء كانت من بيتك او من اصحابك او من الناس اللى بيثقوا فيك

و جت عينك في عينهم

حسيت بإحساس صعب و بإنك مش قادر تبص في عينيهم تاني و تالت
حسيت بخوف من الله و رعشة خجل منهم
حسيت انك مهما تواضعت و همّ مهما كانت عندهم عزة نفس

برده انت في موقف القوة و همّ في موقف الضعف

عشان انت في موقف العطاء و همّ في موقف الأخذ

كام واحد يا ترى بيؤرقه الإحساس ده .. و بيعذبه

ربنا الهمني و علمنى من اخطائي السابقه شوية افكار
ربنا يستر و تكون صح دينياً

الفكرة الأولى في موضوع الإطعام ...في ناس كتير جداً بتكون حساسه لموضوع الأكل ده و احنا داخلين على رمضان و الشنط .. عشان كده حضرتك ممكن تقول للأسرة اللى بتساعدها و عايز تمدها بمواد تموينيه ان جمعيتك ( لو كنت عضو في جمعيه ) او انك تعرف جمعيه خيريه ( لو كنت حضرتك مش متطوع في جمعيه ) ممكن تقول لهم

انك سمعت ان في جمعيه خيريه بتبيع منتجات استهلاكيه باسعار مخفضه عن السوق و انه عرض نازل لفترة محدوده و تجمع طلباتهم في ورقه و تجيبها لهم من اى سوبر ماركت عادي و بعدين تشيل السعر من عليها و تشيلها من الشنط التى تدل على اسم السوبر ماركت اللى اشتريتها منه و تحطها في شنط تانيه بدون ماركه و تقدمها لهم بأقل من ربع الثمن لكل سلعه طلبوها

مثلاً لو كيس اللبن ثمنه 3 جنيه ( او حسب عملة الدوله اللى حضرتك فيها ) تقول لهم انت انه ب75 قرش بس (برده تبع العمله ) و هكذا مع باقي السلع

و بالتالى لمّا تجمع ثمن كل المشتريات عشان تحاسبهم عليها حتلاقي اللى انت اشتريته ليهم ب400 جنيه بتحاسبهم عليه ب100 جنيهة بس ... او يمكن اقل

او لو حتعمل حاجه زي فكرة الكوبونات اللى اعلنت لكم عنها اول الأسبوع يعني تدفع فلوس في سوبر ماركت و تاخد منه بونات بقيمة المبلغ مقسمه ل50 جنيه لكل بون مثلاً ممكن ساعتها تقول لهم ان الجمعيه قدرت تجيب بونات مخفضه او مدعمه من السوبر ماركت و ان البون ب50 جنيه مشتريات لكن ثمنه 10 جنيه بس

و تبيعه ب10 جنيه لهم و تسيبهم بقى يختاروا الوقت اللى نفسهم فيه و يشتروا كمان الحاجه اللى نفسهم فيها بعيداً عن رقابتك او الحرج منك

اهم جزء بقى في الخطه انك و انت بتعرض عليهم الفكرة دي متعرضهاش من زاوية انك بتخدمهم و بتقدم لهم فرصه ذهبيه

لأ لأ

اوعي متاخدش بالك و اللا تبقى بتهد كل اللى عملته

حاول تفهمهم او توصل لهم احساس انك محتاج لهم بشده يساعدوك و ان محدش غيرهم ممكن ياخد بإيدك و يدفع لك ال10 جنيه تمن البون تبرع للجمعيه و ان الجمعيه محتاجه تسوق للبونات دي او للمنتجات دي بفارغ الصبر عشان تستفيد من الفلوس دي

بإختصار شقلب الوضع و خليهم همّ اللى في موقف القوة ... همّ اللى بيدوك ... همّ اللى بينفعوك .. و بيساعدوك و بياخدوا بإيدك .. لمّا يحسوا ان همّ اللى بيدفعوا
و انهم بيتبرعوا لله و بيساعدوك في الخير

الفكرة التانيه :- حاول ان تكون مساعداتك للأسر مستترة يعني مثلاً تدفع لهم فاتورة التليفون المتأخرة او الأجرة المتأخرة للشقه او المصاريف المتأخرة في المدرسه او الجامعه او تسد عنهم دين لحد غلس بيخنقهم بالسداد و تاخد منه الورق و الإيصالات اللى بيهددهم بيها ... او تسيب لهم ظرف فلوس في صندوق البسطه

او تحت ( عقب ) الباب

من غير ما تعرفهم انك انت اللى كنت طرف في ده و لو حكوا لك و همّ مستغربين مثلاً ان في حد دفع لهم و همّ مش عارفين مين هو ... حاول تكون صادق على اد ما تقدر و انت بتظهر اندهاشك ... و عدم تصديقك

و بإنك فرحان جداً ان ربنا كرمهم و ساعدهم من عنده عشان مين؟؟؟؟؟؟روش امامك لحظه

الفكرة الثالثه :- للى بيطلّعوا رحلات للأيتام او بيمنحوا هدايا من ملابس او لعب يا ريت تنبهوا على مشرفين الدور انهم يقولوا للاولاد انهم بيطلعوا الرحله دي او بياخدوا الهديه دي عشان تفوقهم في المجالات المختلفه زي حفظ القرآن الكريم او التفوق الدراسي او التميز في النشاط زي الرسم و كرة القدم او عشان نظافتهم ... الخ

حتى لو استلزم الأمر اعملوا لهم مسابقه ثقافيه ترفيهيه بسيطه قبل موعد الرحله بأسبوع مثلاً في الدار اللى وقع اختياركم عليها او المنطقه اللى حتطلعوا اولادها و قولوا لهم ان اللى حيفوز هو اللى حيطلع الرحله و حاولوا تنوعوا في مجالات المسابقات عشان الكل يفوز

و الهدف هو ان الأولاد ميبقوش عارفين انهم بيطلعوا الرحله دي عشان ايتام او عشان فقراء .... لانى سمعت الكلمه دي من بنت في احد الرحلات كانت بتقول للمسؤل عن المرجيحه في الملاهي بعد ما وقف اللعبه ( ما تزود شويه يا عمّ دي رحلة ايتام ) و زي ما في واحده قالتها ببساطه او ببراءه الأطفال و يمكن تكون سمعتها من حد كبير و بترددها زي الببغاء .. في نفس الوقت كانت في بنت تانيه معاها في نفس الدار و لكنها اكبر سناً بكت و تألمت من كلمتها و زعقت لها و قالت لها ( متشحتيش علينا ) ... الخ

و كتير من الأفكار اللى لو فكرتم شويه في نفس الإتجاه حتلاقوها و تبعتوها لى عشان نتبادل الخبرات ان شاء الله



شكراً
منار عقل